ຟີຟາ ເພີ່ມທີມໃນຮອບສຸດທ້າຍ ຄັ້ງທຳອິດ ບານໂລກ 2026
ສະຫະພັນບານເຕະນາໆຊາດ ຫຼື ຟີຟາ ໄດ້ອອກມາຢືນຢັນວ່າ: ການແຂ່ງຂັນເຕະບານຊາຍຊີງແຊັມໂລກ ຄັ້ງທີ 23 ຫຼື ບານໂລກ ປີ 2026 ທີ່ສະຫະລັດອາ ເມຣິກາ, ການາດາ ແລະ ແມັກຊິກຮ່ວມ ກັນເປັນເຈົ້າພາບ ໂດຍໄດ້ເພີ່ມທີມໃນຮອບສຸດທ້າຍຈາກ 32 ເປັນ 48 ທີມຄັ້ງທຳອິດ, ຟີຟາໄດ້ປ່ຽນຮູບແບບ ການແຂ່ງຂັນຈາກຈະແບ່ງ ເປັນ 16 ກຸ່ມ ກຸ່ມລະ 3 ທີມ ມາ ເປັນ 12 ກຸ່ມ, ກຸ່ມລະ 4 ທີມ. ໝາຍວ່າໃນຮອບແບ່ງກຸ່ມທີມໜຶ່ງຕ້ອງແຂ່ງ 3 ນັດ ແລ້ວຄັດ ເອົາທີ 1 ແລະ ທີ 2 ຂອງກຸ່ມບວກກັບອັນດັບທີ 3 ດີສຸດ 8 ທີມຈາກ 12 ກຸ່ມ ເຂົ້າຮອບ 32 ທີມສຸດ ທ້າຍ. ເຊິ່ງການເລືອກຮູບແບບໃໝ່ນີ້ ເພື່ອໃຫ້ທີມ ທີ່ເຂົ້າຮ່ວມຮອບສຸດທ້າຍໄດ້ລົງແຂ່ງເພີ່ມຂຶ້ນຫາກຕົກຮອບທຳອິດຈາກໄດ້ແຂ່ງ 2 ນັດ ເປັນ 3 ນັດ, ພ້ອມກັນນີ້ກໍເພີ່ມນັດແຂ່ງຂັນຈາກຮູບແບບເກົ່າ ລວມທັງໝົດ 80 ນັດ ມາເປັນ 104 ນັດ. ສຳລັບທີມທີ່ເປັນແຊັມ, ຮອງແຊັມ, ອັນດັບ 3 ແລະ ອັນດັບ 4 ແມ່ນຈະໄດ້ເພີ່ມຂຶ້ນຈາກຜ່ານມາ 7 ນັດ ມາ ເປັນ 8 ນັດ. ສຳລັບ ໂກຕ້າ ບານໂລກ 2026 ຂອງແຕ່ລະຂົງເຂດແມ່ນໄດ້ເພີ່ມຂຶ້ນ: ທະວີບອາຊີ ຈາກໄດ້ 4 ທີມເຄິ່ງ ມາເປັນ 8 ທີມປາຍ, ອາຟຣິກາ ຈາກ 5 ທີມ ມາເປັນ 9 ທີມປາຍ, ຄອນຄາເຄັຟ ຈາກ 3 ທີມເຄິ່ງ ມາເປັນ 6 ທີມປາຍ, ອາເມຣິກາໃຕ້ ຈາກ 4 ທີມເຄິ່ງ ມາເປັນ 6 ທີມປາຍ, ໂອເຊອານີ ຈາກເຄິ່ງທີມ ມາເປັນ 1 ທີມປາຍ ແລະ ເອີຣົບ ຈາກ 13 ທີມມາເປັນ 16 ທີມ, ທະວີບເອີຣົບ ເປັນຂົງເຂດດຽວບໍ່ຕ້ອງແຂ່ງເພລອັອຟຄືກັບຂົງເຂດອື່ນ, ສ່ວນອີກ 5 ຂົງເຂດທີ່ໄດ້ໂກຕ້າປາຍ ໄດ້ມາແຂ່ງຂັນເພລອັອຟກັນເພື່ອຄັດເອົາອີກ 2 ທີມເຂົ້າຮອບສຸດທ້າຍ.
ແຫຼ່ງທີ່ມາ: ໜັງສືພິມກອງທັບ
ວັນທີ 22/03/2023